यसवर्षको बडादसैँको पहिलो दिन घटस्थापना भोलि आइतबार मनाइँदैछ। यस वर्ष घटस्थापनाका दिन चित्रा नक्षत्र र वैधृति योग परेकाले जमरा राख्ने विषयमा विभिन्न चर्चा भइरहेका बेला ज्योतिषीहरूले शास्त्रीय विधिअनुसार पूजा गरेर जमरा राख्न सकिने बताएका छन्।
नेपाल पञ्चाङ्ग निर्णायक विकास समितिका अनुसार भोलि बिहान ११ बजेर ४७ मिनेटमा घटस्थापनाको शुभ साइत रहेको छ। चित्रा नक्षत्र र वैधृति योग परेकाले घटस्थापनाअघि सम्बन्धित शान्ति पूजा गरेर विधिपूर्वक जमरा राख्नु राम्रो हुने धार्मिक जानकारहरूको भनाइ छ।
तर शान्ति पूजा गर्ने विधिबारे जानकारी नभएका वा उक्त विधि पूरा गर्न नसक्नेहरूले जमरा राख्नकै लागि अन्योलमा पर्नुपर्ने अवस्था नरहेको ज्योतिषीहरूले बताएका छन्। उनीहरूका अनुसार भोलि जमरा नराखी घटस्थापनाको भोलिपल्ट द्वितीया तिथिमा बिहान ९ बजेर ११ मिनेटभित्र जमरा राख्न सकिनेछ। त्यस दिन जमरा राख्नका लागि छुट्टै शान्ति पूजा गर्नुपर्ने आवश्यकता नरहेको पनि ज्योतिषीहरूको भनाइ छ।
लमजुङ ब्राह्मण समाजले पनि घटस्थापनासम्बन्धी धार्मिक विधि र तिथिको अवस्थालाई ध्यान दिँदै परम्पराअनुसार पूजा आराधना गर्नुपर्नेमा जोड दिएको छ।
घटस्थापनाका दिन घरघरमा कलश स्थापना गरी दुर्गा भवानीको पूजा आराधना गर्ने र जौ वा मकै छरेर जमरा राख्ने परम्परा छ। यसै दिनदेखि नौ दिनसम्म नवदुर्गाको पूजा आराधना गरिन्छ। विजयादशमीका दिन मान्यजनबाट टीका, जमरा र आशीर्वाद ग्रहण गरेपछि बडादसैँको मुख्य उत्सव मनाइन्छ।
धार्मिक विधि र परम्पराअनुसार घटस्थापना गर्न चाहनेहरूले आधिकारिक पञ्चाङ्ग तथा जानकार ज्योतिषीको सल्लाहअनुसार अघि बढ्न सक्नेछन्।
