काठमाडौं । रसुवा, नुवाकोट, धादिङलगायत क्षेत्रमा भदौ १० गते आएको विनाशकारी बाढीपछि खोज, उद्धार तथा राहत कार्य जारी छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ १८ गते राति ९ बजेसम्म सार्वजनिक गरेको विवरणअनुसार विपद्मा परी १ हजार २५२ जनाको मृत्यु भएको छ भने ४ हजार १२६ जना अझै सम्पर्कविहीन छन्।
प्राधिकरणका अनुसार हालसम्म ११ हजार ९९३ जनाको जीवितै उद्धार गरिएको छ। उद्धार गरिएकामध्ये नेपाली सेनाले हवाई माध्यमबाट मात्रै ४ हजार ३६४ जनाको उद्धार गरेको छ, जसमा २७३ जना विदेशी र ४ हजार ९१ जना नेपाली रहेका छन्। उद्धारका लागि नेपाली सेना तथा निजी हेलिकप्टरले सयौँ पटक उडान गरिरहेका छन्।
५ हजार १३५ जना घाइते
बाढी तथा त्यसबाट सिर्जित विपद्मा ५ हजार १३५ जना घाइते भएका छन्। तीमध्ये ३०१ जनाको विभिन्न अस्पतालमा उपचार भइरहेको प्राधिकरणले जनाएको छ। नेपाली सेना र सशस्त्र प्रहरीमार्फत समेत हजारौँ प्रभावितलाई स्वास्थ्य सेवा उपलब्ध गराइएको छ।
९५ शवको मात्रै सनाखत
फेला परेका १ हजार २५२ शवमध्ये हालसम्म ९५ जनाको मात्र सनाखत भएको छ। मृतकको संख्या सबैभन्दा बढी चितवन, नवलपरासी पूर्व तथा पश्चिम, नुवाकोटलगायत जिल्लामा रहेको विवरणमा उल्लेख छ।
सम्पर्कविहीन हुनेमा सर्वसाधारणसँगै सुरक्षाकर्मी, सरकारी कर्मचारी, जलविद्युत आयोजनामा कार्यरत व्यक्ति तथा विदेशी नागरिकसमेत छन्। विवरणअनुसार ५८३ जना विदेशी नागरिक र विदेशी पर्यटकसँगै गएका १६४ जना नेपाली पनि सम्पर्कविहीन सूचीमा छन्।
२१ हजारभन्दा बढी सुरक्षाकर्मी परिचालित
खोज तथा उद्धारका लागि नेपाल प्रहरी, नेपाली सेना र सशस्त्र प्रहरी बलका गरी २१ हजार ४०२ सुरक्षाकर्मी परिचालन गरिएको छ। यस्तै, नुवाकोट, धादिङ, रसुवा र काठमाडौंका विभिन्न होल्डिङ सेन्टरमा ३ हजार ९४८ जना आश्रय लिइरहेका छन्।
राहत र सञ्चार सेवा पनि निरन्तर
प्रभावित क्षेत्रमा सडकमार्गबाट ट्रक तथा बोलेरो र हवाई माध्यमबाट समेत राहत सामग्री पठाउने क्रम जारी छ। काठमाडौंमा रहेका खाद्य तथा गैरखाद्य सामग्री प्रभावित क्षेत्रमा पठाइएको छ।
बाढीबाट क्षति पुगेका सञ्चार संरचना पनि क्रमशः सञ्चालनमा आएका छन्। नेपाल टेलिकमका क्षतिग्रस्त ११० वटै टावर सञ्चालनमा आइसकेका छन् भने एनसेलका ७८ मध्ये ७५ टावर सञ्चालनमा रहेका छन्।
पछिल्लो विवरणअनुसार विपद्को मानवीय क्षति अझै बढ्न सक्ने र सम्पर्कविहीनको खोजी जारी रहेकाले तथ्यांक थपघट हुन सक्ने प्राधिकरणले जनाएको छ।
